Nangunguna na ang GMA Network pagdating sa TV ratings at audience share sa Urban Luzon, ayon sa data mula sa AGB Nielsen Media Research noong Setyembre hanggang unang dalawang Linggo ng Oktubre.

Nasa Total Urban Luzon ang 76.2% ng kabuuang urban TV household population sa bansa, ayon sa AGB Nielsen.

Nagkamit ang Kapuso Network noong Setyembre ng 42.4% TV Household Audience Share, samantalang ang ABS-CBN ay nagtala ng 40.3%.

Noong mid-October, umakyat pa ang audience share ng GMA sa 44.6% habang ang ABS-CBN ay bumaba sa 39.4%.

Mula ika-1 hanggang ika-13 ng Oktubre, nanguna ang Marimar sa listahan ng top 30 programs sa buong urban Luzon. Nagtala ito ng 33.5% household ratings.

Pito sa nangungunang 10 programa sa nasabing period ay gawang Kapuso. Kabilang sa mga nangunguna sa listahan ang Mga Mata ni Anghelita, Kap’s Amazing Stories, Zaido: Pulis Pangkalawakan, Bitoy’s Funniest Videos, Tok! Tok! Tok! Isang Milyon Pasok at 24 Oras.

Habang umuusad sa ratings ang GMA, patuloy ang paglago ng kumpanya. Nakapagtala ito ng higit na malaking net income kumpara sa ABS-CBN nitong nakaraang 3^rd quarter.

Patuloy rin ang pagpapalakas ng signal ng GMA at pagtatayo ng mga istruktura sa probinsya para sa mga manonood nito lalo na sa Southern Luzon, Visayas at Mindanao.

Samantala, patuloy pa rin ang pagiging lider ng GMA sa Mega Manila. Umakyat ang ratings nito mula 44% noong 3^rd Quarter ng 2007 hanggang 47.7% noong mid-October. Ang ABS-CBN naman, bumagsak mula 35.3% hanggang 33.4% sa nasabing period.

Sa Mega Manila pa rin, 22 sa 30 nangungunang programa ay gawa ng Kapuso. Ang Marimar, Mga Mata ni Anghelita, at Zaido: Pulis Pangkalawakan ang nakakuha ng tatlong pinakamatataas na puwesto.